Huruma sasa Hakuna?

Familia ya Nyerere yahofia kunyang'anywa urithi

Na Reginald Simon, Dodoma

FAMILIA ya Baba wa Taifa, Mwalimu Julius Nyerere
imeishutumu serikali bungeni kwa kupuuza mapendekezo
waliyotoa katika Muswada wa Sheria ya Kuwaenzi Waasisi
wa Taifa uliopitishwa na bunge jana.

Shutuma hizo zilitolewa bungeni jana na mtoto wa Baba
wa Taifa, Rosemary Nyerere (Viti Maalum-CCM), wakati
anachangia mjadala wa muswada huo, uliowasilishwa na
Waziri wa Nchi, Ofisi ya Rais, Menejimenti na
Utumishi, Dk. Mary Nagu.

Alisema, kwa namna fulani, familia yao ilishirikishwa
katika vikao vya kamati ya bunge ya Sheria na Utawala,
na kikao cha watalaamu wa serikali, lakini baadhi ya
mapendekezo waliyoahidiwa kwamba yataingizwa kweye
muswada yamepuuzwa.

Mbunge huyo alibainisha kuwa uandishi wa muswada huo
unaitia familia hiyo wasiwasi.

Kipengele kimojawapo kati ya viwili vinavyodaiwa
kupuuzwa, ni kukosekana kwa jedwali la orodha ya
maeneo ambayo familia ilipendekeza yaingizwe katika
kumbukumbu za mwalimu Nyerere.

Lengo la pendekezo hilo ilikuwa ni kuitaka serikali
isiichagulie familia hiyo maeneo yatakayoingizwa
katika kumbukumbu za mwalimu.

“Tuna hofu. Tutaondoa hofu ikiwa jedwali hilo
litawekwa katika sheria hii,” alisema Rosemary ambaye
hata hivyo, alisisitiza kuwa si lengo la familia
kukwamisha muswada huo.

Alisema ingawa baba wa Taifa alikuwa wa wote, warithi
wa mali binafsi za mwalimu ambazo zinajadiliwa katika
sehemu kubwa ya muswada huo ni familia yake, ‘si
serikali wala Taasisi ya Mwalimu Nyerere (MNF)’.

Pia, familia ilipendekeza kurekebisha kifungu cha 21
kinachohamisha umiliki wa mali za mwalimu zilizoko
mikononi mwa mtu binafsi au taasisi, kama vile hotuba
za mwalimu alizomikisha kwa Taasisi ya Mwalimu Nyerere
(MNF) kuwa chini ya serikali ili mali hizo
zisichukuliwe na serikali.

Mbunge huyo alisema kuwa muswada huo hauna tafsiri
rasmi inayotenganisha mali za familia na za serikali
ili wasiingiliane katika umiliki, jambo alilosema
asipolisemea familia ya mwalimu na watoto wake
wanaweza kumsuta.

Kuhusu matumizi ya jina la Nyerere, Rosemary alishauri
mfuko utakaoanzishwa na serikali chini ya sheria hiyo,
uitwe Mfuko wa Waasisi wa Taifa (Founders of the
Nation Trust Fund) ili jina lake lisiingiliane na
nyingine, ikiwemo inayotarajiwa kuanzishwa na familia.

Rosemary alilieleza bunge kuwa alipomfuata Mwanasheria
Mkuu wa Serikali, Andrew Chenge juu ya mapendekezo ya
familia alimpa ‘majibu ya kushangaza.

“Tulikaa na wataalamu wakiwemo wa serikali
tukakubaliana sasa naelezwa kuwa ninataka kuwarudisha
nyuma na kuwa ahadi zilikuwa na kamati si za serikali.
Kwa kweli majibu hayo yalinishangaza,” alisema
Rosemary wakati kaka yake, Madaraka Nyerere
akisikiliza kwenye chumba cha wageni.

Hoja za familia hiyo, zimliungwa na mkono na mbunge wa
Sumbawanga Mjini (CCM), Paul Kimiti aliyesema endapo
serikali itaamua kila mali za mwalimu zifanywe
kumbukumbu wanafamilia watabaki bila chochote.

Alisema ingependeza nyumba ya mwalimu ya Mwitongo,
Butiama, kuwa ya kumbukumbu ili watalii wawe
wanakwenda kuona mwalimu alivyokuwa anaishi, lakini
hilo haliwezekani kwa kuwa ndiyo wanayokaa
wanafamilia.

Kimiti aliungana na Kambi ya Upinzani kupendekeza kuwa
kama serikali inataka nyumba za waasisi ziwe za
kumbukumbu, basi iwajengee nyingine.

Akiwasilisha maoni ya kambi hiyo, Grace Kiwelu (Viti
Maalum-CHADEMA), alisema muswada huo haujali maslahi
ya warithi wa kisheria wa waasisi wa Taifa na una
lengo la kuwafilisi.

Akiibu hoja za wabunge, Waziri Nagu, alisema si nia ya
serikali kuwafilisi warithi wa waasisi kwa kuwa hakuna
kitakachochukuliwa bila idhini ya familia husika.

Alisema serikali, kama ilivyopendekezwa na kamati ya
Bunge ya Sheria na Utawala, itaendelea kuwasiliana na
familia za waasisi hao, ya Mwalimu Nyerere wa
Tanganyika na Abeid Aman Karume wa Zanzibar.

mwisho